دليل سريع للعب على لينٌكس 01

دليل سريع للعب على لينٌكس هتكون سلسلة من البلوجات بتتكلم بشكل مبسط بالعربي عن البرامج والادوات المتاحة عشان تلعب على لينكس.

================
قائمة المحتويات:

مقدمة
منصات الالعاب
بونص
================

مقدمة:
بداية من أغسطس 2019 حولت لنظام لينكس بشكل كامل بعد ما كنت مستخدمة ويندوز لسنين طويلة، بالرغم من اعتقادي في الاول اني هتعسف عشان اعرف اتعود عليه واتعامل والاقي بدايل للبرامج اللي كنت بستخدمها على ويندوز اكتشفت ان دا مش صحيح، وانه فيه بدايل كتير كويسة وفي الغالب مجانية وحرة\مفتوحة المصدر، وبعد حوالي 8 شهور اقدر اقول اني ماوحشنيش ويندوز بأي شكل.
مؤخرا ابتديت ارجع للجيمنج وبدأت استكشف اللعب على لينكس عامل ازاي.
مبدأيا أغلب العاب الPC بتكون متاحة على ويندوز واحيانا ماك بس، وفقا للتبرير ان سوق لينكس مش كبير وبالتالي شركات الالعاب مش هتبذل مجهود انها تطور العاب للينكس.
مش هدخل في تفاصيل التاريخ والتغييرات اللي بتحصل دلوقتي، بس مؤخرا دا ابتدا يتغير، وشركات توزيع العاب زي Steam مثلا نزلت نسخة من الابليكيشن بتاعها للينكس وادوات كتير تطورت أو بقت متاحة عشان تقدر تشغل برامج والعاب ويندوز على انظمة تشغيل تانية. والموضوع مابقاش تعسيفي زي الاول، بس لسه فيه تعسيف بدرجة ما، فلو انت عايز تحمل تفك الضغط تسطب تلعب خليك على ويندوز.
دا هيبقا بناءا على تجربتي الشخصية وعلى التوزيعة اللي بستخدمها (Ubuntu 19.10)
الدليل دا بيتعامل انك نزلتي لينكس بالفعل واستقريت على التوزيعة وجاية تشوفي ايه الكلام.


================

المعدات ونظام التشغيل اللي بستخدمهم
:Hardware
Intel Core i5-8250U CPU @ 1.60GHz × 8
NIVIDIA GeForce MX150/PCIe/SSE2
12GB RAM
1TB HDD
OS: Ubuntu 19.10. Gnome Desktop 3.34.2
================

نبذة من لستة الالعاب اللي جربتها على لينكس (مش اللستة كلها):
Dota 2
Shroud of the Avatar: Forsaken Virtues
Portal & Portal 2
League of Legends
PES 19
Dragon Age: Inquisition
The Witcher 3
================

الأوبشن الأول: منصات الالعاب.

1- Steam
ستيم واحد من أكبر منصات توزيع وادارة الالعاب، متاح انك تحمل الابليكشن بتاعهم على لينكس اللي بيسهل ادارة والوصول للالعاب اللي عندك.
استخدام ستيم سهل، مش محتاج اكتر من انك تعملي عليه حساب، وتحملي الابليكشن وتختاري الالعاب من عليه وتحملها.
دي لستة بالالعاب المتاحة للينكس على سيتم سواء مجانية أو مدفوعة.
كمان لو عايز تستخدم العاب ويندوز فيه اوبشن انك تفعل حاجة اسمها Proton من جوا ستيم.
تفعيل بروتون: بعد ماتحمل الابليكيشن > على الشمال فوق
Steam > Settings > Steam Play

وهنا قاعدة بيانات بروتون بتصويت الناس، ممكن تدور على اللعبة اللي عايزها وتشوف الناس اللي جربتها على لينكس قيمتها ازاي وايه الايرورز اللي طلعت معاهم وأي مشاكل اخرى.
================

2- Good Old Games (GOG.com)
نفس فكرة ستيم، فيمعادا انه متاح على لينكس من البراوزر بس، GOG Galaxy او ابليكيشن ادارة الالعاب بتاعهم مش متاح على لينكس في الوقت الحالي رغم انه في كلام ان دا هيبقا متاح في المستقبل.
لكن لسه تقدر تعمل حساب وتحمل الالعاب المتاحة للينكس عندك.
هتختاري اللعبة، تضيفها لل Cart تعملي تشكأوت، تدفع أو لا لو ببلاش، تروح الاكاونت بتاعك  هتلاقي لينكات التحميل هناك.
غالبا هينزل كShell Script (sh) عشان تسطبه دوس كلك يمين وبعدين Properties وبعدين Permissions وبعدين علم على بوكس Allow Executing File as A Program اخرج ودوبل كلك فالتسطيب هيشتغل.
ودي لستة بالالعاب المتاحة للينكس على جوج.
================

3- Itch.io
اتش منصة للالعاب الاندي indie واشياء اخرى.
ممكن تحملي الابليكيشن بتاعهم او تستخدمه من البراوزر، ومتاح عليه عدد كبير جدا من الالعاب للينكس او العاب HTML5 واللي ممكن تلعبها من البراوزر مباشرة من على اي نظام تشغيل.

قايمة الالعاب+حاجات المتاحة للينكس.
================

ملحوظة: فيه منصات تانية كتيرة، لسه مااتعاملتش معاها بشكل مباشر، وعشان كدا دي بلوجاية قابلة للتحديث دايما.

الاجزاء الجاية هتكون بتتكلم عن الالعاب اللي مش متاحة على أي منصة من اللي ذكرتهم، او الالعاب اللي عندك وعايز تسطبها وتشغلها يدويا.
================

بونص:
شراء Gift Cards لSteam ببتكوين:
https://www.bitrefill.com/?hl=en
اماكن ممكن تلاقي عليها اجابات لاسألتك او معلومات اضافية:
https://www.reddit.com/r/linux_gaming
https://www.gamingonlinux.com
https://www.reddit.com/r/leagueoflinux
نظم تشغيل خاصة بالجيمنج مبنية على لينكس (لسه ماجربتهاش):
https://store.steampowered.com/steamos

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.